Detyra kryesore e këtij departamenti do të jetë zhvillimi dhe përdorimi i teknologjive informatike e i metodave matematike për organizimin, administrimin, përpunimin dhe analizën e të dhënave në sektorë të ndryshëm të kërkimit shkencor e aplikativ, në fushën e gjeoshkencavee e të sizmologjisë.  Ai merr pjesë aktivisht në studime e projekte të ndryshme brenda dhe jashtë vendit, dhe ofron mbështetjen e nevojshme matematike e informatike për projekte të ndryshme që ndërmarrin sektorë të tjerë të Institutit të Gjeoshkencave. Ristrukturimi i burimeve ekzistuese të informacionit në sisteme digitale lehtësisht të kapshëm e të përdorshëm, duhet të jetë një nga përparësitë kryesore të tij.

Në të njëjtën kohë, duke patur parasysh zhvillimet tejet intensive në fushën e IT–ve dhe ndikimin e fuqishëm të tyre në të gjitha fushat e kërkimit shkencor e qeverisjen elektronike, është e kuptueshme se Departamenti i Teknologjive të Gjeoinformacionit duhet të luajë një rol të rëndësishëm në formimin universitar, kryesisht në ciklin e dytë e të tretë të studimeve dhe në kualifikimin shkencor të shkencëtarëve të rinj.

Fushat kryesore të veprimtarisë së këtij Departamentit do të jenë:

• Organizimi, ruajtja, përpunimi shkencor dhe shërbimi i informacionit, konceptimi dhe organizimi i tij në baza elektronike të dhënash përmes zhvillimit të arkitekturave adekuate, vendosjes së standarteve, formalizimit të përshkrimeve dhe përdorimit masiv të Sistemeve të Informacionit Gjeografik (GIS) e të shërbimeve të Internetit, duke ofruar metodologjitë e reja dhe teknologjitë digitale për informimin e shpejtë të organizmave përkatëse e të publikut të gjërë, si dhe për të mundësuar e lehtësuar bashkëpunimin ndërkombëtar me institucionet analoge.
• Përdorimi në fusha të ndryshme të Gjeoshkencave, i metodave të matematikës së zbatuar dhe të teknologjive informatike me qëllim hetimin dhe identifikimin e marrëdhënieve dhe të bashkëlidhjeve midis faktorëve e parametrave të ndryshëm si dhe të prirjeve të ndryshimit të tyre, modelimin matematik të dukurive e të proceseve duke integruar të dhëna nga burime të ndryshme (vrojtime fushore, analiza laboratorike, regjistrime instrumentale, matje me GPS, fotografi ajrore, imazhe satelitorë, DTM, etj.). Përdorimi i metodologjive probabilitare e i modeleve stokastike në vlerësimin e rrezikut e të riskut sizmik, hartografimi dhe paraqitjet grafike 2D e 3D me ndihmën e metodave numerike e të teknologjive digitale do të mundësojnë studime më të thelluara në fushat përkatëse dhe do të lehtësojë interpretimin e dukurive e të   proceseve komplekse.
• Operimi mbi bazë 24 orëshe dhe përdorimi efikas për kërkime shkencore e aplikative i rrjetit të përhershëm kombëtar të GPS-ve, si dhe vënia në dispozicion të organizmave e institucioneve publike dhe të kompanive private të interesuara, të informacionit të përditshëm të grumbulluar prej tij.